PRIMAVERA ’68
(Nella valle del Belìce)

Semu ‘nta marzu e già la primavera
apri li vrazza carrichi di ciuri;
stisu a lu ventu comu ‘na bannera
lu campu godi ‘nta lu gran splinduri.

Ridi la funtanedda e sbrizzia l’acqua
nni la terra assitata di caluri,
e nni la saja l’anatra si sciacqua
mentri lu merlu canta lu so’ amuri.

La rininedda torna e ‘un trova nidu
nni li casi distrutti di Bilìce;
talia li genti afflitti e jetta un gridu:

"eu rifazzu lu nidu, ma vui – dici –
poviri genti illusi, chi sa quantu
senza casa at’a stari ed infilici!"

Salvatore Scuderi