ME’ FIGGHIA
La guardu quannu dormi: è un angiuliddu;
bedda la vucca, russi li masciddi.
E’ comu’nt’un jardinu un arvuliddu
Riccu di virdi pampini e ciuriddi.
La guardu quannu joca: è diavuliddu;
capiddu svulazzanti, occhi priati,
e ridi e curri e sata comu un griddu,
e poi m’abbrazza ‘ncerca di vasati.
Si chianci, pista pedi e fa capricci,
donna mi pari, forti, risoluta,
capaci di livarisi di ‘mpicci.
Si saggia poi la trovu e attidicata,
cu la pupidda ‘mbrazza addurmisciuta,
mamma mi pari, veru assistimata.
Salvatore Scuderi