L’AGNEDDI E LU PICURARU

Lu suli si nn’acchiana: è jornu chinu
E ncapu la muntagna è già ristura
La terra ch’era fridda d’ammatinu.
Vistuta di biddizzi è la natura.

Lu greggi, sparsu mmezzu la suddata,
pasci l’irvuzza. Fermu lu pasturi
quarda l’agneddi, nati nni l’annata,
chi satanu cuntenti ntra li ciuri.

"Beddi armaluzzi, - dici – si crisciti
quanta lanuzza e latti ch’ata fari!"
Nna pecura, chi pasci nni ddi siti,

senti lu dittu e mettisi a bilari;
pensa a so’ figghiu datu a lu vicceri,
e li avverti: "Di l’omu ‘un ti fidari".