L’ASTRONAUTI

"Sintistivu, cumpà, chi l’astronauti
già stannu p’arrivari nni la luna?"
"Nasì, cumpà, nni semu ‘mprissiunati
la ‘mprisa è granni e scoti la pirsuna".

"’Na cosa ‘un mi cumminci e vi l’è diri:
si, puta casu, arrivanu a la meta
quannu la luna sta pi scumpariri
comu sti… pu ci vannu a lu pianeta?"

"E’ facili, cumpà, la luna è chiana,
comu stu piattu cca cu la quagghiata;
basta girari anticchia e nun luntana

ti trovanu la facci chiù allargata.
S’arrivanu a lu latu unn’è affilata
Si tagghianu… ed è fatta la ‘nsalata"".