ARBA A LA DRAUNARA

Spuntau già l’arba nni la Draunara; (1)
lu suli cumpariu di la Gurfotta,
e l’acquazzina brilla chiara chiara
su la virdura frisca di la zotta.

Tra l’ummira e la luci, a lu vischittu,
fumia la terra modda chi spapura;
lu raggiu di lu suli tira rittu:
si va rispecchia nni la birvatura.

Lu rusignolu canta, un merlu vola,
e murmuria la zachia a lu mulinu
mentri giurannu ‘ntunnu va la mola.

Lu vinticeddu fa di viulinu
tra lu cannitu fittu di lu gurgu;
lu mulinaru canta e bivi vinu.

Salvatore Scuderi