LA SCUZZULATA

Ficu d'innia scuzzulata
si di tutti ricircata
pi lu sapuri chi tu hai
a l'abbramatu fai diri aiai!

Si dici, chi finu a vinti
nun fannu nenti,
anzi stappanu li rini
chiù di certi medicini.

La sanguigna è prelibata,
la muscaredda nzuccarata,
la gialla di la Muntagnola
è chiù duci di li cannola.

Chidda di lu Cannateddu
arricria lu picciutteddu,
chidda di lu Mardazzu
fa liccari lu mustazzu.

Ma ogni rosa avi li spini
pi teniri luntanu li cretini,
la ficu d'innia n'avi tanti
tu munnala cu li nguanti.

Poi ringrazia lu viddanu
chi la curtiva ancora a manu
e lu Celu soprattuttu
chi ni detti 'stu gran fruttu.

Andrea G. Randazzo